Menu
Shengo Press Release

Shengo Press Release (13)

ከጠቅላይ ሚኒስትር አብይ አህመድ የሚጠበቁ ቀጣይ እርምጃዎች

ግንቦት 28 ቀን 2010/June 05, 2018
የአገራችንን ሕዝብ ከሚያስከብሩት ባህሪያት አንዱ የሚያስደንቅ፣ አንዳንዴም እልህ የሚያጨርስ እርጋታው ነው። ይህንንም ገፀ- ባህሪ በዘፈኖቹ፣ ውብና ድንቅ በሆኑ ተረቶቹና አባባሎቹ እየቋጠረ ለትውልድ ሲያስተላልፍ ቆይቷል። ዶክተር አብይ የኢትዮጵያ ጠቅላይ ሚኒስትር ሆነው ከተሾሙ በኋላ ባደረጓቸው ንግግሮችና በወሰዷችው እርምጃዎች የተማረከ፣ በርካታ የአገራችን ሕዝብ፣ ከላይ የተጠቀሰውን ዓይነት እርጋታ በተላበሰ መልኩ እስቲ እንያቸው የሚል ወደ ድጋፍ ያዘመመ አቋም ይዞ ሰንብቷል። በሌላ በኩል ደግሞ አናሳ ድምፆች አሁን የተያዘውን የለውጥ ሂደት በጥርጣሬ ዓይን የሚመለከቱ ክርክሮች ሲያሰሙ ተደምጧል።
ካለፈው ሣምንት ጀምሮ ከዶክተር አብይ መንግሥት በኩል የሚወርዱ ዜናዎች፣ እስካሁን በቃላት ብቻ ሲገለጽ የሰነበተውን የለውጥ አቅጣጫ በተግባር የሚተረጉሙ እርምጃዎች እየተወሰዱ መሆናቸውን ያበስራሉ። ከነዚህ ውስጥ የአስቸኳይ ጊዜ አዋጁን ለማንሳት የተላለፈው ውሳኔ፣ እነ አቶ አንዳርጋቸውን ጨምሮ በርካታ የፖለቲካ እስረኞችን መልቀቅ፣ ታዋቂ ፖለቲከኞችን ከሽብርተኞች ስም ዝርዝር መሰረዝ፣ የሽብርተኛ አዋጅ የተባለውን ድንጋጌ ለማሻሻል የተወሰደው እርምጃ ወዘተ.. ይገኙበታል። ጠቅላይ ሚኒስትሩ ከፍተኛ የጦር ኃይል መሪዎችን ሰብስበው፣ ጦሩ ብሄራዊና ሙያተኛ ጦር መሆን እንደሚገባው ያስተላለፉት መመሪያ የሚደገፍ ነው። ሸንጎ እስካሁን የተወሰዱትን እርምጃዎች በአዎንታዊ መልክ እንደሚመለከታቸው እየገለጽን ወደፊትም አገሪቱንና ሕዝቡን ወጥረው የያዙ አፋኝ ህጎች በሙሉ እንዲሰረዙ ለሚደረገው ጥረትና ሌሎችም በሀገራችን ውስጥ ሰላምና መረጋጋት እንዲሰፍን የሚረዱ፣ የሕዝባችንን ጥቅም የሚያስጠብቁና መብቱን የሚያስከብሩ እርምጃዎች በተወሰዱ ቁጥር በአወንታዊና መልክ እንደምንቀበላቸውና ወደ ዴሞክራሲያዊ ሥርዓት ሊያሸጋግሩ የሚረዱ እርምጃዎች በመሆናቸው የምንደግፋቸው መሆኑን ለመግለጽ እንወዳለን።
እነዚህ በቅርብ ጊዜ የተወሰዱ እርምጃዎች፤ ተስፋ ሰንቆ ለቆየው ሕዝብ ተጨማሪ መተማመኛና ጉልበት ከመሆናቸውም ባሻገር የተጠራጣሪዎችንም ልብ የሚያረጋጉ ክስተቶች እንደሚሆኑ አያከራክርም። ይህ ሁኔታ በለውጥ ፈላጊው ጎራ ውስጥ ውህደት፣ ስምምነት ብሎም ኃይልና ጥንካሬ የሚፈጥረውን ያህል፣ በለውጥ አጋች ቡድን ውስጥ ደግሞ ፍርሃትና ሽብር እንደሚፈጥርም ሰሞኑን በገሃድ መታየት ጀምሯል። አሁን ባለው መንግሥት ውስጥ በለውጥ ፈላጊዎችና በለውጥ አጋቾች መካከል ትግልና መተናነቅ በግልጽ እየተጋጋመ ነው። ከዚህ ቀደም እንደነበረው ለማስመሰል የሚደረግ ሽኩቻ ነው በሎ መገመት ትልቅ ስህተት ነው። በዚህ ትግል ውስጥ የፖለቲካ ድርጅቶችና ሕዝቡ ሚናቸውን መለየት ይኖርባቸዋል። ሕዝቡም ሆነ የፖለቲካ ድርጅቶች ከለውጥ ፈላጊዎች ጋር ተሰልፎ እስካሁን የተገኙትን ድሎች በመጠቀም የሥርዓት ለውጥ ለማምጣት ሕዝባዊ ትግሉን ማስቀጠል የግድ ነው።፡ በዚህ ወሳኝ ወቅት፣ በአገዛዙና ከአገዛዙ ውጪ ያለው የለውጥ ፈላጊ ኃይል ተባብሮ የሚገፋ ካልሆነ የለውጡ ሂደት እንዳይጨናገፍ እንሰጋለን።
ከላይ የተጠቀሰው እንደተጠበቀ ሆኖ፤ የዶክተር አብይ መንግሥት ብሄራዊ መግባባትንና የፖለቲካ ምህዳሩን በማስፋት ደረጃ እስካሁን ያልተመለሱ ጥያቄዎችን እንዲመልስ አበክረን እንጠይቃለን። ከነዚህም ውስጥ እጅግ አጣዳፊ ናቸው ብለን የምናምንባቸው፦
• ብሄራዊ መግባባትን እውን ለማድረግ፤ በመንግሥትና በተፎካካሪ ኃይሎች መከከል ጉባዔ አድርጎ ዋና ዋና የአገሪቱን ችግሮች ለመፍታት እርምጃ መውሰድ፣
• በውጭ አገር ለሚገኙ የፖለቲካ ፓርቲዎች ሀገራቸው ውስጥ ገብተው ለመንቀሳቀስ እንዲችሉ የደህንነት ዋስትና የሚሰጥ ህግ ማወጅ፣

• የፖለቲካና የህሊና እስረኞችን በሙሉ በአንድ አዋጅ መልቀቅ፣ መዳረሻቸው የጠፋ እስረኞችን መኖር/መሞት ማሳወቅ፣
• በሲቪክ ድርጅቶችና በነፃ ፕሬስ ላይ የተጫኑ አፋኝ ህጎችን ማንሳት የሚሉት ናቸው።

ዜጎች ሁሉ የተገኙትን ድሎች እየተንከባከቡ፤ ለበለጠ ለውጥ ተግተው ይሠራሉ! የኢትዮጵያ ሕዝብ ትግል ይቀጥላል!

Read more...

ሸንጎ ለሚቀጥሉት ሁለት ዓመታት የሚያገለግለውን አመራር መረጠ

 

በኦታዋ ካናዳ በተካሄደው ጉባኤ በአውሮፓውያን አቆጣጠር በ2012 የተመሠረተውና የኢትዮጵያ የአንድነት ኃይሎች ትልቁ ስብስብ የሆነው የኢትዮጵያ ሕዝብ የጋራ ትግል ሸንጎ፣ (ሸንጎ) በዛሬው ዕለት ባካሄደው የምክር ቤት ስብሰባ ለሚቀጥሉት ሁለት ዓመታት ድርጅቱን የሚመሩ የሥራ አስኪያጅ ኮሚቴ አባላትን መርጧል።

በዚህም መሰረት ከስራ አስኪያጅ ኮሚቴው አባላት ውስጥ ዶክተር ታዬ ዘገዬን፣ ሊቀመንበር ወይዘሮ ጽጌረዳ ሙሉጌታን ምክትል ሊቀመንበር አቶ ግደይ ዘርአጽዮንን ዋና ጸሀፊ እና አቶ መሐመድ ጀሚልን ምክትል ዋና ጸሀፊ አድርጎ መርጧል፡፡ የተቀሩት የኮሚቴው አባላት ደግሞ የተለያዩ የተግባር ኮሚቴወችን በኃላፊነት ይመራሉ።

ሸንጎው በቅርቡ አጠቃላይ ጉባዔ በማካሄድ ኢትዮጵያችንና ሕዝቧ የሚገኙበትን ሁኔታ በጥልቅ ከመረመረ በኋላ ሀገራችን ከምትገኝበት አስከፊና አደገኛ የግፍ ሥርዓት ተላቃ አንድነቷ ተጠብቆ እኩልነት፣ ሰብአዊና ዴሞክራሲያዊ መብቶች እንዲሁም የህግ የበላይነት ወደ ተከበረበት ለሁሉም ዜጎቿ የሚሆን ህገ መንግሥታዊ ሥርዓት ለመሸጋገር የሚያስችለውን ለውጥ እውን ለማድረግ መደረግ በሚገባቸው መሠረታዊ ጎዳዮች ላይ የትግል አቅጣጫ ነድፏል።

ይሀ አሁን የተመረጠው የሥራ አስኪያጅ ኮሚቴ በሀገራችንና በሕዝባችን ላይ ብቻ ሳይሆን በአንድነት ኃይሎችም ላይ የተነጣጠረውን ጥቃት በመመከትና የአንድነት ኃይሎችን በማጠናከር የሕዝባችን የነፃነት ራዕይ እውን እንዲሆን ለማስቻል ከፍተኛ አደራን ተቀብሏል።

ይህን ለማድረግም ከባዕዳን ተጽእኖ ነፃ ሆኖ ራሱ የጉዳዩ ባለቤት የሆነውን ሕዝብ ያማከለና መሠረት ያደረገ ትግልን አጠናክሮ ይቀጥላል።

የሸንጎው የጋራ አቋሞች:-

  • በኢትዮጵያ ግዛታዊ አንድነት በሕዝብ የሥልጣን ባለቤትነትና ሉዓላዊነት ላይ የማያወላውል እምነት
  • ፍትህ የሰፈነበትና የህግ የበላይነት የተረጋገጠባት ኢትዮጵያን እውን ለማድረግ ጸንቶ መታገል
  • ማንኛውም ኢትዮጵያዊ ግለሰብ ዴሞክራሲያዊና ሰብአዊ መብቶቹ መከበር አለባቸው ብሎ ማመን
  • በኢትዮጵያ ሕዝብ መካከል ምንም ዓይነት አድሏዊነት እንዳይኖርና ኢትዮጵያውያን ሁሉ በሕግ ፊትና በሶሻልና የፖለቲካ ነፃነታቸው እኩል ዜጎች መሆናቸውን በተግባር ማረጋገጥ
  • የህወሀት/ኢህአዴግ መንግስትና አገዛዝ ሥርዓት የአፈናና የጭቆና ሥርዓት በመሆኑ መለወጥና በህገ-መንግሥታዊ ዴሞክራሲያዊ የአስተዳደር ሥርዓት መተካት እንዳለበት መቀበል

የሚሉት ሲሆኑ እነዚህን መሠረታዊ መተክሎች የሚቀበል ማንኛውም ግለሰብ፤ ስብስብ ወይም ድርጅት ሸንጎውን በመቀላቀል ወይም በጋራ በመሥራት ሕዝባችንንና ሀገራችንን በጋራ እንድንታደግ ጥሪያችንን በድጋሜ እናቀርባለን።

ኢትዮጵያ ለዘላለም ትኑር

ድል ለኢትዮጵያ ሕዝብ

Read more...

ብሄራዊ መግባባትና መልካም አስተዳደር “እንዳያማህ ጥራው እንዳይበላ ግፋው” መሆን የለበትም!!

የኢትዮጵያ ህዝብ የጋራ ትግል ሽንጎ (ሽንጎ) በሀገራችን ውስጥ የሚታየውን አስከፊ ሁኔታ ቀይሮ አንድነቷ በተጠበቀ ኢትዮጵያ ውስጥ ሁሉም ሰው ከፍራቻና፣ ከሰቆቃ ተላቆ መብቱ ተረጋግጦ ፣ እንዲኖር እነሆ ትግሉን ከጀመረ ውሎ አድሯል።

ይህን ራእይ ተግባራዊ ለማድረግም ህዝብን ያማከለ፣ ሰላማዊ፣ ትግል የማካሄድ፣ አስፈላጊነትን አምኖ ይሀንኑም በራእይ ደረጃ አስቀምጧል። ከዚህም አልፎ ታቃዋሚው በሀገር ቤት ወይም በውጭ ሀገር የሚገኝ በሚል አላስፈልጊ ክፍፍል ወይም መሰረታዊ ባልሆኑ የልዩነት ነጥቦች ላይ በማተኮር ራሱን እና አጠቃላይ ትግሉን ከሚጎዳ አካሄድ ተቆጥቦ፣በጋራ ለመቆም የሚያሰችለው የትግል አንድነት እንዲፈጥርና አቅሙንም እንዲገነባ  ደግመን  ደጋግመን አሳስበናል።

አሁን ባለው ሁኔታ ሽንጎ ትልቁ የአንድነት ሀይሎች ስብስብ ቢሆንም አሁንም ገና ወደአንድ ጎራ ሊሰባሰቡ የሚገባቸው እጅግ ብዙ ድርጅቶች፣ስብሰቦችና ግለሰቦች እንዳሉ ግልጽ ነው። ይህን ሃይል አሰባስቦ አይበገሬ ያንድንት ሀይል መፍጠርና ትግሉን ማፋፋም፣ እያደር ወደተወሳሰብ ጎዳና በማምራት ላይ የምትገኘውን ሀገራችንንና ህዝባችንን ለመታደግ ዋነኛው መሳሪያ ነው። ይህ መሰረታዊ ዋሰትና ሳይዘገይ ተግባራዊ እንዲሆንም አሁንም ሳንታክት ጥረታችንን እንቀጥላለን።

የትግላችን  ራእይ የግፍ እና የኣድልኦ ስርአት አክትሞ፣ የህግ የበላይነት፣ ሰብአዊ መብት፣ የሁሉም ዜጋ የግልና የጋራ መብት የሚከበርበት በሁሉም ባለድርሻዎች ሙሉ ተሳትፎ የዳበረ ህገመንግስታዊ ዴሞክራሲአዊ ስርአትን እውን ማድረግ ነው።

ሽንጎ ደግሞ ደጋግሞ እንደገለጸው እና ባለፈው ነሀሴ ባካሄደው ጉባኤው እንዳጸደቀውም፣ የሀገራችንን ውስብስብ ችግሮች ለመፍታት፣ የሁሉንም ዜጎች አወንታና ታአማኒነትን ያገኘ ስርአት ለመመስረት ሀገራችን ያላት አማራጭ በብሄራዊ መግባባትና በብሄራዊ እርቅ ጎዳና መጓዝ ነው።

ይህ ሂደት ካግላይነት የተላቀቀ፣ ሁሉንም ኢትዮጵያዊ ያሳተፈ፣ የሁሉንም ድምጽ ለማዳመጥ፣ የቆረጠ፤ ለጋራ ችግራችን የጋራ መፍትሄን ለመፈለግ የሚያስችል መሆን ይገባዋል። በኛ አመለካከት ብሄራዊ መግባባትና ብሄራዊ እርቅ የተወሰኑ ክፍሎች ወይም ድርጅቶች ከደረሰባቸው ውጥረት ለመወጣት የሚጠቀሙበት የጊዜ መግዣ ታክቲክ ሳይሆን በሀገራችን ውስጥ የሚታዩ ፖለቲካዊ፣ማሀበራዊና ሌሎችንም ችግሮቻችንን ፊት ለፊት በጋራ መርምረን በአርቆ አሳቢነት፣ በብሰለትና፣ በመቻቻል፣ በወንድማዊና እህትማማች ስሜት፣ሁሉም አሸናፊ የሚሆንበት  የጋራ መፍትሄ ለመፈለግ የሚደረግ እውነተኛ ጉዞ ነው መሆን ያለበት።

ይህ ሲሆን ብቻ ነው ለዘላቂ ሰላም፣ ለልማት፣ ለምንመኛት ታላቅ የበለጸገች ኢትዮጵያ መሰረት የምንጥለው። ይህ ሲሆን ብቻ ነው፣ አላስፈልጊ ደም መፋሰስን፣ የእርስ በርስ መጠፋፋትን ፣ የንብረት መውደምን፣ ስደትን፣ ጽንፈኛነትን፣ ቂም በቀልን አስወግደን ከራሷ ጋር የታረቀች ፣ የጦርነት አዙሪትን የሰበረች ከውጭ ሊሰነዘር ለሚችል ጥቃት ያልተጋለጠች ፖለቲከኞች ከስልጣን በተወገዱ ቁጥር፣ለእስር ወይም ለስደት የማይዳረጉባት ንብረታቸው ከሀግ ውጭ የማይነጠቅባት፣ሀገርና፣የፖለተካ ስርአትን ለመመስረት የሚያሰችል መሰረት የምንጥለው።

በዚህ አንጻር ባለፉት ጥቂት ሳምንታት ውስጥ የገዥው ህወሀት/ኢህአዴግ መሪ ጠቅላይ ሚኒሰተር አቶ ሀይለማርያም ደሳለኝ መንግስታቸው በኢትዮጵያ ውስጥ የነጻ ፕሬስን መብት ለማክበርና ከተቃዋሚዎች ጋር በሀገሪቱ ዋና ዋና ጉዳዮች ላይ ለመመካከር ፍላጎት እንዳለቸው ፣ሌሎችም በህጋዊነት እንዲንቀሳቀሱ ሲሉ ተናግረዋል።

በሸንጎው አመለካከት አሁን በስልጣን ላይ ያለው የህወሀት/ኢህአዴግ መንግስት የችግሩ አንዱ አካልና ዋናው መሠረት በመሆኑ የሀገራችንን የተወሳሰበ ሁኔታ ለብቻው ሊቀይረው ከቶውንም አይችልም፡፡ እንዲያውም አሁን ባለው መልኩ እየቆየ በሄደ ቁጥር የሚወስዳቸው እርምጃወች ችግሩን ወደባሰ መወሳሰብ ያሳድገዋል። በሀገራችን ውስጥ  ጎልተው ከሚታዩት ብሶቶችና ጥያቄዎች አንጻር ሲታይ አንድ ድርጅት በተናጠል ልዩ  መፍትሄ አምጥቶ ሁሉንም ሊያረካ አይችልም።ይህ ቢሆን ኖሮ የህወሀት/የኢህአዴግ የ24 አመታት ጉዞ የኢትዮጵያን ችግር በፈታው ነበር።

የሀገራችንን ውስብስብ ችግሮች በትክክል መረዳት እና  መቅረፍ የሚቻለው ለጥቂት ሰአታት በጠባብ አጀንዳ ላይ ለተቃዋሚዎች ገለጻ በመስጠትና  በገዥው ቡድን እቅድ ላይ “ሀሳባችሁን አካፍሉን “ ወይም “ወደሀገር ተመልሳችሁ ስሩ” ከሚል ንግግር ባሻገር ሁሉንም አሳታፊና እውነተኛ  በሆነ ብሄራዊ መግባባትን እውን ሊያደርግ በሚችል ሂደት ነው።

በሀገራችን ውስጥ የሚታየውን አይነት  የተወሳሰበ ችግር መፍታት የሚቻለው አንዱ መፍትሄ ሰጭ ሌላው ደግሞ መፍትሄ ተቀባይ በሚሆኑበት አካሄድ ሳይሆን ሁሉም የችግሮቹ ባለቤት ሁሉም ደግሞ የመፍትሄዎቹም ባለቤት ሲሆኑ ነው። የሀገራችንን ውስብስብ ችግሮች  መፍታት የሚቻለው ፍትህን፣ መተማመንና፣ አርቆ አሳቢነትን መሰረት አድርጎ ያለፉ ችግሮች እንደገና እንዳይደገሙ ምን መደረግ እንዳለበት  ዋና ዋና በሆኑ ጉዳዮች ላይ በግልጽ ተነጋግሮ መግባባትና መስማማት ላይ መድረስ ሲቻል ነው።

ኢትዮጵያ ለሁሉም ኢትዮጵያዊ ቦታ ሊኖራት ይገባል፤ ኢትዮጵያ የሁሉም ኢትዮጵያው ቅሬታ፣ የሚደመጥባት፣ መፍትሄም የሚፈለጋባት ልትሆን ይገባል። ኢትዮጰያ በዜጎቿ መካከል የበኩር ልጅ እና የእንጀራ ልጅ የሚባለው አይነት አድልኦ ለማስተናገድ የማትመች መሆን አለባት።ኢትዮጵያ አንዱ ሌላውን “መንገዱን ጨርቅ ያድርግላችሁ፣ ከቻላችሁ ሞክሩን” የሚባልባት ሀገር መሆን የለባትም።

ይህን እውን ለማድረግም ማንንም ያላገለለ ሁሉም ባለድርሻዎች በሚሳተፉበት የብሄራዊ መግባባትና ብሄራዊ እርቅ ሂደትን እውን ማድረግ ይጠይቃል።ይህ ሂደት ድፍረትን የሚጠይቅ ነው። ሀገሪቱንና ህዝቧን አሁን ወደሚገኙበት ውስብስብ ሁኔታ ካደረሳቸው አካሄድ መላቀቅን የግድ ይላል። ይህ ሂደት በዜጎች መካከል ፣ በተለያዩ ፖለቲካ ድርጅቶች መካከል፣ ወዘተ እምነትን መገንባትን እና እንዳለፉት ጊዜያት ሁሉ ያሁኑ “ጥሪም” የፖለቲካ ጊዜ መግዣ  አለመሆኑን ማረጋገጥን ይጠይቃል። ይህን ሁኔታ የሚጠይቀውን የመተማመን መሰረት ለማጣል ደግሞ ቢያንስ ቢያንስ በየእስር ቤቱ የሚማቅቁትን የፖለቲካ እስረኞች ጋዜጠኞች ወዘተ መፍታት ለነጻ ፕሬሱና አሁን በህጋዊነት ተመዝግበው በመስራት ላይ ለሚገኙት የፖለቲካ ድርጅቶች ደግሞ የመፈናፈኛ ሜዳውን ማመቻቸት አንድ ታላቅ እርምጃ ይሆናል።

ይህ ባልሆነበት “ኑ ተሳተፉ;  ምክክር እናድርግ” ማለቱ “እንዳያማህ ጥራው እንዳይበላ ግፋው” በሚለው በሀገራችን ብሂል የሚገለጥ ይሆናል።ይህ ደግሞ የሀገራችንን ችግር ከመቅረፍ ይልቅ ይበልጥ ያባብሰዋል።

ድል ለኢትዮጵያ ህዝብ

የኢትዮጵያ ህዝብ የጋራ ትግል ሸንጎ

Read more...

በወገኖቻችን ላይ የሚካሄደው አፈናና ጭፍጨፋ ባስቸኳይ ይቁም

በPDF ለማንበብ ይህን ይጫኑ

በአለፉት  ሳምንታት በተለያዩ የሀገሪቱ ክፍሎች በተለይም በመሀል፣  በምእራብ፣ ምስራቅና ደቡብ ምእራብ ኢትዮጽያ የስርአቱን ፖሊሲዎች በመቃወም ሰላማዊ ሰልፍ ያደረጉ ተማሪወች በገዥው ወያኔ ኢህአዴግ ጸጥታ ሀይሎች መደብደባቸው፣ መታሰራቸውና በጭካኔ መገደላቸው በተለያዩ የዜና ማሰራጫዎች በመገለጥ ላይ ነው።

ወያኔ ኢህአዴግ ላለፉት 24 አመታት እንዳደረገው ሁሉ አሁንም ሰላማዊ ተቃውሞን በሀይል ለማፈን መሞከሩ በሀገራችን ውስጥ አላስፈላጊ የሆነ መካረርን ከማስከተሉም በላይ የሀገራችንን ውስብስብ ችግሮች እጅግ ወደተወሳሰበ ደረጃ ያደርሰዋል።

የኢትዮጵያ ህዝብ የጋራ ትግል ሽንጎ በገዥው ቡድን ህይወታቸውን ላጡ ወገኖቻችን፣ ለቤተሰቦቻቸውና ለዘመድ አዝማድ  እንዲሁም ጉዳት ለደረሰባቸው ሁሉ የተሰማውን  ሀዘን እየገለጠ በሰላማዊ መንገድ መብታቸውን ለማስከበር ሁሉም ኢትዮጽያውያን የሚያካሂዱትን ትግል በጉልበት ለማፈን የሚደረገውን ሙከራ ሁሉ በጥብቅ ያወግዛል።

የሀገራችን ዘርፈብዙ ችግሮች በትእግስት፣ በመደማመጥ፣ ባርቆ አሳቢነትና ለህግ በመገዛት እንጂ በጉልበትና ባፈና ሊፈታ እንደማይችል ገዥው ቡድን ሊገነዘብ ይገባዋል። ትላንት ከትላንት ወዲያ እንደተደረገው ሁሉ ዛሬም የዜጎችን ደም በማፍሰስ በማሰርና በማሰፈራራት ተቃውሞን አፍኖ የስልጣን እድሜን ለማራዘም መሞከር እጅግ ሀላፊነት የጎደለው ብቻ ሳይሆን፣ ፈጽሞ ማስተዋል አለመቻልም ነው። ገዥው ቡድን በህዝብ ላይ የሚያካሂደው አፈና ሁሉ እንዳልሰራ በተገነዘበ ቁጥር እጅግ ዘግናኝ ወደሆነ ተጨማሪ ተግባር እያመራ ይገኛል። አሁን ያለው ሁኔታ ወገኖቻችንን በገዥው ቡድን የጸጥታ ሀይሎች እጅግ አሰቃቂ ጭፍጨፋ ሊጠብቃቸው እንደሚችል ያመላክታል።

በድጋሚ የስርአቱ መሪዎች ከዚህ የወንጀል ተግባር እንዲታቀቡ ፣ በህዝብ ላይ ለደረሰው ጭፍጨፋና ስቃይ ተጠያቂ የሆኑ ሁሉ ለፍርድ እንዲቀርቡ እያሳሰብን ሁሉም ኢትዮጵያዊያን አንዱ ዜጋ ሲነካ ሁሉም እንደተነካ በመገንዘብ የስርአቱን የግፍ እርምጃ በጋራ እንዲያወግዙና በጋራ እንዲቋቋሙ ከማንኛውም ጎራ ለሚመጣ የከፋፋይ ሴራ ሰለባ እንደይሆኑ ጥሪያችንን እናቀርባለን።

የተቃወሚ ድርጅቶችም ሆኑ የሲቪክ ማህበራትም ታራ የፖለቲካ ጥቅም ለማግኘት ከመሯሯጥ ይልቅ ሀገራችንና ህዝባችን ያሉበትን እጅግ አሳሳቢ ሁኔታ ተገንዝበው የህዝባችንን አንድነት አጠናክሮ የሀገራችንን ደህንነት አደጋ ላይ ሳንጥል የስርአት ለውጥ ለማምጣት የህዝባችንን ትግል ማቀነባበር የሚቻልበትን መንገድ ባስቸኳይ ለመፈለግ በጋራ እንድንነሳ የትብብር ጥሪያችንን በድጋሚ እናቀርባለን።

ድል ለኢትዮጵያ ህዝብ!

 

 

Read more...

የኢትዮጵያ ድንበር እየተቆረሰ ለጉርብትና የሚሰጥ ገጸበረከት(ዳረጎት) አይደለም

ለብዙ ዘመናት በኢትዮጵያውያን መስዋእትነት ተከብሮ የኖረው የኢትዮጵያ ድንበር ከቅርብ ጊዜ ወዲህ በአገር በቀል በሆነው የውጭ ሃይሎች አገልጋይ ህወሃት/ኢሕአዴግ የተባለ ቡድን በብሔር ስም አገራችንን በታትኖ ለሚመሰርተው ጎጠኛ መንግስት ድጋፍ ለመሰብሰብ ሲል ኢትዮጵያውያን ለዘመናት ከትውልድ ትውልድ እየተረካከቡ የኖሩበትን በቁመቱ 1600 ኪሎሜትርና ስፋቱ ከ40-60 ኪሎሜትር የሆነ ለም መሬት “ለታላቋ ትግራይ” ምስረታ ዓላማ ገና ከጅምሩ ለተባበረችው ሱዳን አሳልፎ ለመስጠትና ድንበር ለመካለል ሽር ጉድ እያለ ነው። “የታላቋን የትግራይ”ን ክልል ለማስፋት ሲባል ኩታገጠም የሆነውን የጎንደርንና የወሎን ክፍለ አገር ሰፊና ለም መሬት በጉልበት የትግራይ ክልል ውስጥ ቀላቅሎ ሕዝቡንም ከሚናገራቸው ቋንቋዎች በአንደኛው ፣በትግርኛው ምክንያት ካለሕዝቡ ምርጫና ፍላጎት በማጠቃለልና በማስፈር በሕዝብ መካከል መቃቃርና ቋሚ ግጭት ለመፍጠር በትጋት ቀጥሎበታል።በምስራቁም ቢሆን ሶማሌዎች ይገባናል ብለው ከኢትዮጵያ ጋር በተደጋጋሚ ጦርነት የከፈቱበት ጥያቄ በመሆኑ ጠንከር ያለ የሶማሊያ መንግስት የለም እንጂ ቢኖር ለመፈራረም ወደዃላ አይልም፤የኦጋዴን ነጻ አውጭ ነኝ የሚለው ተገንጣይ ሃይል ፈርጠም ካለ የሚጠይቀውን የኢትዮጵያ ግዛት ገንጥሎ ከሶማሊያ ጋር ለመቀላቀል ወይም የራሱን ክልል መንግስት ለማቋቋም በውጭ አገርና በወያኔ ሚስጥራዊ ድጋፍ ጭምር ሁኔታው ከቀን ወደቀን እየተመቻቸለት ነው።በኬንያም በኩል ቢሆን የይገባኛል ጥያቄ ቢነሳ የኢትዮጵያ ሞያሌን አሳልፎ ለመስጠት ህወሃት/ኢሕአዴግ አይግደረደርም። ጅቡቲም ደፍራ የአፋር መሬት ይገባኛል ብትል ህወሃት ቆርሶ ከመስጠት አይመለስም። በመሃል አገርም ውስጥ የተለያዩት ተገንጣይ ሃይሎች ከበረቱ፣ጭራሽ ለመቆጣጠርና ለመግዛት የማይቻልበት ሁኔታ ከተፈጠረ “ጨዋታ ፈረሰ ዳቦ ተቆረሰ” በማለት ሕዝቡን ከቀውስና ከእርስ በርስ ጦርነት ውስጥ ከተው ወደአዘጋጁት ቦታ ለመሄድ ለህወሃት/ ኢሕአዴግ መሪዎች አይከብዳቸውም። “የታላቋ ትግራይ” ሕልም እውን ከሆነ የሌላው መኖር አለመኖር አያስጨንቃቸውም።

 የክልል ጥያቄ ሌላ መልክ እየያዘና እየተካረረ መጥቷል።በኦሮሚያ ክልል ውስጥ የሚታየው የአላስነካም ትግል የዚህ አንዱ አካል ነው።የትግሉ አዝማሚያ ሲመረመር በኢትዮጵያ አንድነትና በዴሞክራሲ ስርዓት መስፈን ዙሪያ ሳይሆን የማንን መሬት ማን ይወስዳል የሚል ጎሳና ክልል ተኮር የሆነ ተቃውሞ ነው።ወያኔ በቀየሰው መንገድ ኢትዮጵያን በጎሳና በክልል ለያይቶና ሸንሽኖ ለመበታተን የሚደረገውን ማንኛውንም ጸረ አንድነት ንቅናቄ ሸንጎ ይቃወማል፤ይታገላልም። ከሁሉም በፊት ግን የጎሳ ፖለቲካና እንቅስቃሴ ለማንም እንደማይበጅና ሁሉንም የሚጎዳ መሆኑን ደግሞ ደጋግሞ እየገለጸ ትግሉ ሁሉን ያቀፈና ያሳተፈ ለጋራ ጥቅም መሆን እንደሚገባው ይገልጻል።

በህወሃት/ኢሕአዴግና  በሱዳን መካከል የሚደረገውን የድንበር ውል እንደማይቀበለውና ይህን በውጭ ሃይሎች ፍላጎት ላይ የተመሰረተ ኢትዮጵያን የማዳከምና የማፈራረስ ተንኮል በዝምታ እንደማይመለከተውና እንደማይቀበለው እየገለጸ በድንበር ኮሚሽን የቀረበውን ታሪካዊ ማስረጃና የባለቤትነት ጥያቄ ከልብ ይደግፋል።በሚፈለገው ቦታ አብሮ ለመቆም ዝግጁ ነው።     

በሌላውም ያገሪቱ ክፍል ሕዝባዊ እንቅስቃሴ በመቀጣጠል ላይ ነው።የክልል ዓላማ ከሚያስተናግዱት ጎን ለጎን በኢትዮጵያዊነት ፣ለኢትዮጵያ አንድነት፣ለዴሞክራሲ ስርዓት መስፈን፣ለሕግ የበላይነት የሚታገሉትም በተለያየ መንገድና ቦታ በሚችሉት መንገድ ድምጻቸውን እያሰሙ ነው።ከነዚህ ጋር ሸንጎ የትግሉ አካል መሆኑንና አብሯቸው እንደሚሰለፍ ሊገልጽ ይወዳል።

በየአቅጣጫው እየተካረረ የመጣው ሕዝባዊ እንቅስቃሴ ሁለት ዓይነት ክስተቶችን ሊወልድ ይችላል።

1ኛ.የጎሰኞች እንቅስቃሴ ከተጠናከረና የአንድነቱ ሃይል ከተዳከመ ኢትዮጵያ የመገነጣጠል ዕድሏ ከፍተኛ ይሆናል።

2ኛ.የአንድነት ሃይሉ ከተሰባሰበና እንደ ሃይል ከወጣ የሚፈራው አደጋ ሊቀለበስ ይችላል።

የኢትዮጵያ መገነጣጠል ለማንኛውም ቢሆን የሚሻልና የሚጠቅም አይሆንም። ትርፉ ይበልጥ ደቃቃና ደካማ ሆኖ ለውጭ አደጋ መጋለጥና ከድህነት ሳይወጡ እርስ በርሱ በድንበር ምክንያት፣በማያባራ ግጭት ውስጥ መኖር ነው።

ለሁሉም ጠቃሚና የሚሻለው መንገድ ሃይልን አስተባብሮ የጋራ ጠላትን አሶግዶ በአንድ አገር ልጅነት፣በኢትዮጵያዊነት ተከባብሮ  የሚኖሩበትን ዴሞክራሲያዊ ስርዓት አስፍኖ ለመኖር በጋራ መታገል ነው። ለዚህ የጋራ ድል በተለያየ ብሄርና በፖለቲካ ድርጅት ስም ተነጣጥለው የሚታገሉት አንድ ላይ ሆነው የጋራ መመሪያ በማውጣት ትግላቸውን የሚያቀናጅ አካል መፍጠር ይኖርባቸዋል። ጊዜውም አሁን ነው።ያ የሚፈጥሩት አካል ወያኔ በተወገደ ማግስት የሽግግር መንግስት ለማቋቋም የሚረዳ መሠረት ሊሆን ይችላል።ከዚህ ውጭ በያዙት መንገድ ከቀጠሉ ማንም ያሰበውን ሳያገኝ ባለው ጨቋኝ መንግስት ወይም ከሱ ባልተለዬ አዲስ መጥ ዘረኛና አምባገነን ቡድን ሲደሙ ከባሰም ኢትዮጵያ ተበታትና  አገረ ቢስ ሆኖ በያገሩ ተሰዶ መኖር ይሆናል።

ጊዜው ከመምሸቱ በፊት አሁን በረፋዱ ሰዓት የግል ፍላጎትን ትቶ በጋራ ፍላጎት ላይ ማተኮር ይገባል። 

የኢትዮጵያ ሕዝብ የጋራ ትግል ሸንጎ (ሸንጎ ) በአገር ቤትና በውጭ አገር የሚታገሉት ኢትዮጵያውያን በአስቸኳይ ተሰብስበው አገራችንን ለገጠማት ችግርና አደጋ መልስ መስጠትና ለአገር አድን ተጋድሎ መዘጋጀት እንዳለባቸው ጥሪ እያደረገ ለመተባበር ዝግጁ መሆኑን ይገልጻል። 

ኢትዮጵያ በአንድነት ለዘላለም ትኑር!

Read more...

“ፍየል ወዲያ ቅዝምዝም ወዲያ!!”

በትናንትናው ዕለት የህወሃት/ኢሕአዴግ ጠ/ሚኒስትር አቶ ሃይለማርያም ደሳለኝ ህወሃት በሚቆጣጠረው ፓርላማ ተገኝቶ መንግስቱ በወጠነው የአምስት ዓመት መመሪያና በተለያዩ ርዕሶች ላይ ማብራሪያ ሰጥቷል።

የታቀደውን የኤኮኖሚ ትራንስፎርሜሽንን በተመለከተ የግብር አሰባሰቡ በበለጠ እንዲያድግ የሚያስገድድ ሕግ እንደረቀቀ፣ በገጠሩ የልማት እንቅስቃሴና መጠነኛ የእንዱስትሪ ተቋማት እንዲጎለብቱ የልማት ባንኩ ብዙ ካፒታል መድቦ ዘርፎችን በመዘርጋት ለመንቀሳቀስ እንደታሰበ ያብራራ ሲሆን በአለፈው የአምስት ዓመቱ ዕቅድ የባከነውን ገንዘብና የአገር ሃብት ከቁጥር ውስጥ ሳያስገባ እንዳልነበረ አድርጎ ሸፋፍኖ አልፎታል። የልማት ባንኩ ለህብረተሰቡ የሚሰጠውን ጥቅምና አገልግሎት ቢጠቅስም፣ ብድርና ድጋፍ የሚያገኘው የህብረተሰብ ክፍል በግልጽ አልተቀመጠም። በማንኛውም አገር 90 በመቶ የሚሆነውን የስራ ዕድል የሚፈጥረው የግል ክፍሉ ነው። የግል ክፍሉ ይህን ለማድረግ የሚችለው የሚሰራበት መሬት፣ የአጭር፣ የመካከለኛና የረጅም ጊዜ ብድር በተፈለገው መጠን ለማግኘት ሲችልና በአገሪቱ ክፍሎች በሙሉ ያለምንም ገደብ ለመንቀሳቀስ ሲችል ነው። በተጨማሪ አገር ተከልና አገር ወለድ የግል ክፍል ከፍተኛ ሚና ሊኖረው የሚች ለውመንግሥት ለውጭ ኢንቬስተሮች የሚሰጠውን አድላዊ ድጋፍና እንክብካቤ በመቆጠብ ለኢትዮጵያውያን ፊቱን ሲያዞር ነው። ......ሙሉውን ለማንበብ ይህን ይጫኑ

Read more...

የህዝቡ መነሳሳት ሁሉን አሳታፊ የሆነን የስርዓት ለውጥ ለማምጣት እንዲችል ምን ይደረግ?

 

ሕዝብ መብቱን ሲነፈግ፣ያገሩ ክብርና አንድነት ሲደፈር፣በሰላም ሠርቶ ማደር ሲሳነው፣በኑሮ ውድነትና በሥራ አጥነት ሲወጠር፣ጭራሽ የመኖር ተስፋው ሲጨልም ከትዕግስትና ከመንፈሳዊው የትግል ዘዴ ከጸሎት ወጥቶ በአደባባይ በሚገለጽ ተቃውሞ ውስጥ ለመሳተፍ ወይም ነፍጥ አንስቶ ለመፋለም ይገደዳል።በዚህም የትግል ሜዳ ውስጥ ሲገባ  አምባገነን መንግስት ጉንጉን አበባ ይዞ እጁን ዘርግቶ እንደማይቀበለው ያውቀዋል።ከመንግሥት ሊሰነዘር የሚችለውን የበቀል አመጽ አይዘነጋውም። መሞት፣መቁሰል፣መደብደብ፣መታሰርና መንገላታት እንደሚኖር ገና ከጥዋቱ  ቢረዳም ድምጹን አጥፍቶ፣አንገቱን ደፍቶ ከመኖር ይልቅ የመጣውን ለመቀበል ቆርጦ ያልሞት ባይ ተጋዳይ እርምጃ  ይወስዳል።

ሕዝብ ለሚወስደውና ለሚከተለው የትግል አቅጣጫ መሰረቱ መዋናነት የህዝቡን ጥያቄ ለመስማት የማይሻ፣በራሱ እብሪት የሚመራ አምባገነን መንግሥት በስልጣን ላይ መኖሩ ነው።ሕዝቡ በተደጋጋሚ ለሚያሰማው እሮሮ መልስ ካላገኘ ደፍሮ አደባባይ መውጣቱ የማይቀር መሆኑ በተደጋጋሚ በአገራችንና በሌሎች አገሮች የታዬ ሂደት ነው።የሂደቱ መደምደሚያ የሚሆነው ይዋል ይደር እንጂ የሕዝቡን ጥያቄ የማይቀበሉ መንግሥታት ተወግደው ስልጣኑ በሌሎች እጅ መውደቅ ይሆናል።

በሕዝብ ትግል ሳቢያ ሊመጣ የሚችለው ለውጥና የሥልጣን እርክክቦሽ በተለያየ፣ማለትም በጠቃሚና በጎጂ አቅጣጫ ሊሄድ ይችላል፤

አንደኛ ሕዝብ በቅጡ እንዲደራጅና ሁሉም በትግሉ ተሳታፊና የውጤቱ የጋራ ባለቤት እንዲሆን፣ከጎጠኝነት የራቀ በልበ ሰፊነት በቀልን አሶግዶ በመቻቻል፣አገር አድኖ ሕዝብ ለማዳን ጥረት የሚያደርግ  ከሁሉም የተውጣጣ ትግሉን የሚመራ አካል ከተፈጠረ የሚመጣው ለውጥ ተስፋ ሰጭና ለሁሉም የሚጠቅም ይሆናል።

በሌላው አቅጣጫ ደግሞ በሕዝቡ ትግል ጀርባ የሕዝቡን መብት እና ጥያቄ እያነሱ ግን ሁሉም ሕዝብ የሚሳተፍበትን መድረክ እያጠበቡ በተወሰኑ ሃይሎች ብቻ የሚመራ፣ሌሎችን ያገለለና ያራቀ፣ በጠባብ ቡድናዊ ስሜትና የተወሰኑ ክፍሎቸ ጥቅም ላይ ያተኮረ አመራር በመፍጠር መሰረታዊ ለውጥ ለማምጣት ባይቻልም እንደ አጋጣሚ ስልጣን ለመያዝዕድሉና ሁኔታው ቢፈቅድ የሚመጣው ለውጥ የስርዓት ሳይሆን የባለስልጣኖች መቀያየር ይሆንና ሕዝቡን በአዲስ ጉልበተኞች ለቀጣይ ስቃይና ስርዓት የሚዳርግ  ይሆናል።የዚህም ሂደት ውጤት በተደጋጋሚ በተለያዩ አገሮች ሲከሰት የታዘብነውና የምናውቀው ነው የዚህ አይነቱ ለውጥ በአገራችን በኢትዮጵያ እንዲከሰት የሚሻ ቀና ልቦናና ጤነኛ አይምሮ ያለው ኢትዮጵያዊ ይኖራል ብለን አንገምትም። ይህ ማለት ግን በዛ አይነት አሰራር  ውጤት ለማምጣት የተሰለፉ የሉም ማለት አይደለም፤ አሉ።መኖራቸውም በተደጋጋሚ በሚያደርጉት የአግላይነትና የተንኮል ሴራ የተረጋገጠ ነው።

በአገራችን በሁሉም አቅጣጫ ይብዛም ይነስም ሕዝባዊ ተቃውሞ በተለያየ ደረጃና መልክ ሲገለጽ ቆይቷል።አሁን የዛ የተለያየ የሕዝብ ተቃውሞ እየሰፋና እየጠነከረ መንግሥትን ከሚያሰጋበት ደረጃ ላይ የደረሰ ይመስላል።ግምቱን ወደ ውጤት ለማሻገርር የሚቀረው ነገር ቢኖር ትግሉን አቅጣጫ የሚያሲዝና የሚመራ ሃይል  ከመፍጠሩ ላይ ነው።አሁንም በየፊናው ተከፋፍለው የሚጮሁ ድርጅቶች አልጠፉም እንደውም ቁጥራቸው ጨምሯል።

በአሁኑ እየተጋጋለ በሄደው ሕዝባዊ ተቃውሞ ምክንያት መኖራቸው የማይታወቅና ጠፍተው የነበሩ አንዳንድ ድርጅቶች ሳይቀሩ አንገታቸውን ብቅ ብቅ በማድረግ ውድድር ውስጥ እየገቡበት ነው።፣ ትላንት ከትላንት ወዲያ ኢትዮጵያንና ኢዮጵያዊነትን ሲያወግዙ የተደመጡ ሃይሎች ሳይቀሩ ለሕዝብ አንድነትና ጥቅም የቆምን ነን እያሉ መናገር ከጀመሩበት ጊዜ ላይ ደርሰናል።

ቀድሞም ሆነ አሁን ወደፊትም ቢሆን የኢትዮጵያ ሕዝብ መብት፣የአገር ሰላምና አንድነት ሊጠበቅ የሚችለው ሁሉም ተባብሮ መታገል ሲችል ብቻ እንደሆነ ከታሪካችንና ከውድቀታችን ልንማር ይገባል።በተናጠል ወይም በውጭ ሃይሎች እርዳታና ድጋፍ  በጥቂቶች የሚመጣ ለውጥ ከድጡ ወደ ማጡ እንጂ ወደተሻለ ስርዓት አይወስድም።

 የሁሉም ዜጋ ጥያቄና ፍላጎት በዋናነት ተመሳሳይ ነው፤የአማራው ከኦሮሞው፣ከትግራዩ፣ከአፋሩ፣ከደቡቡ፣ ከጋምቤላው፣ከጉራጌው…ወዘተ የተለየ ፍላጎት የለውም።ሰብአዊ መብቱ፣የዜግነት መብቱ ተከብሮለት በአገሩ ሊያገኝ የሚገባውን ድርሻ አግኝቶ እሱም የድርሻውን አበርክቶ በክብር መኖር ነው የሁሉም ፍላጎት።የየክልሉ አርሶ አደር ጥያቄ የሚያርሰው መሬት ባለቤትነትን፣መፈናቀል እንዲቀርለት በገፍ የሚከፍለው ግብርና የማዳበሪያ ዋጋ እንዲቀነስለት፣ልጆቹን አስተምሮ ለማሳደግና ለቁም ነገር ለማብቃት በሀገሩ ጉዳይ ላይም ሙሉ ተሳታፊ መሆን እንጂ ሌላ ምኞትና ፍላጎት የለውም።የየብሔሩ ወጣትም እንዲሁ ተምሮ የመስራትና በአገሩ ተከብሮ እየኖረ የበኩሉን ለአገሩ ለማበርከት እንጂ ሌላ ምኞት የለውም።ሁሉም ከችግርና ከመከራ ኑሮ ተላቆ መብቱ ተከብሮለት በሰላም መኖርን ይሻል።ትልቅና የበለጸገች ኢትዮጵያ፣ለዜጎቿ የምትመች ኢትዮጵያ፣የእራሷን ጥቅምና ክብር፣ዳርድንበር አሳልፎ የማይሰጥ መንግስት ያላት ኢትዮጵያ እንድትኖረው የማይመኝና የማይፈልግ የለም።

ይህ  የጋራ ሕዝባዊ ፍላጎት ወደ ተግባር ሊተረጎም የሚቻለው ሁሉንም በአንድነት አስተባብሮ ሊመራ የሚችል፣የሕዝቡን ጥያቄ ለመመለስ ከሕዝብ ጋር አብሮ የሚመክር መንግስት ሲኖር ብቻ ነው።ያ መንግስት ደግሞ በጥቂቶቸ ፍላጎትና ጥረት የሚፈጠር ሳይሆን ሁሉም አውጣጥቶ በጋራ የሚፈጥረው በተለይም እርስበርስ  ማጋጨትን፣ መከፋፈልን “እኛና እነሱ “ የሚል አግላይ መርሆና መርሃግብር ማጠንጠኛው ያላደረገ  የህብረተቡንም አመኔታ ያገኝ ስርአትና መንግስት ሲፈጠር ብቻ ነው።

በተመሳሳይ በጠባብና አግላይ አስተሳሰብ የሚመራ ተለያይቶ የቆመ ቡድን የሚያስተጋባው ጥሪና  የሚመራው ትግል የሚያመጣው ለውጥ ካለውና ሁሉም ከሚጠላውና ከሚታገለው የወያኔ ስርዓት የተሻለ አይሆንም። ስለሆነም የዚህ አይነት የትግል ሂደት ሊያስከትል የሚችለውን አደጋ በቅድሚያ አውቆ አደጋው እንዳይከሰት መከላከያ ማበጀት ለጋራ ሕዝባዊ ጥቅምና ደህንነት የሚያስቡ ሁሉ ድርሻና አላፊነት ነው።በዝምታና በቸልታ ከዳር ቆመው የሚታዘቡት ድራማ አይደለም፣ነገ በእያንዳንዱ ኢትዮጵያዊ ላይ ሊደርስ የሚችለውን ማጤኑና መዘጋጀቱ በተግባርም የትግሉ ተሳታፊ በመሆን የወደፊቱን አቅጣጫ ለሁሉም በሚበጅ መንገድ እንዲሆን የነቃ ተሳትፎ ማድረግ አስፈላጊ ነው።

እውነት ሁሉም የተቃዋሚ ሀይሎች የአምባገነንነትን ማብቃት የሕዝቡን አብሮ መኖር፣የአገራችን ኢትዮጵያን አንድነትና ልዑላዊነት የምንሻ ከሆነ በአንድነት አብረን የጋራ ሃይል የሚፈጠርበትን ዘዴ ባሰቸኳይ መሻት ይጠበቅብናል። ያ ደግሞ  በቀጠሮ የምናስቀምጠው ወይም ለተወሰኑ ቡድኖች በጎ ፈቃድ የምንተወው ሳይሆን ለዛሬው ያገራችን ሁኔታ  ሁላችንም የምንሰጠው አስቸኳይና ትክክለኛ መልስ ይሆናል።

እስከዛሬ ድረስ አግላይና ተከፋፍሎ የሚገኝ የፖለቲካ አካሄድ በሀገራችን ህዝብ አንድነትና የነጻነት ትግል ላይ ያሰከተለውን አሉታዊ ተጽእኖ ሁሉም የሚረዳው ነው፡፡ ይህ ሁኔታ ሰፊ አለመተማመንና ጥርጣሬን በወገኖቻችን ውስጥ ዘርቶ ይገኛል። ለግፈኛው ስርአት እድሜ መራዘምም ረድቷል። ይህን ለመስበር እና መተማመንን እንደገና ለመገንባት ሰፊ ስራ መሰራት ይኖርበታል። ለዚህም የድብቅብቆሽ ፖለቲካ ተላቆ በትግስት በግልጽነታና ባርቆ አሳቢነት፤ በሰጥቶ መቀበል መንፈስ መስራት አስፈላጊ ነው።

ሰሞኑን በአሜሪካና በሌሎች የአውሮፓ ከተሞች ቁጥራቸውና ስማቸው የበዛ የፖለቲካና የብዙሃን ድርጅቶች ለየአገራቱ መንግሥታት የድጋፍ መጠየቂያ ሰልፍ ለማድረግ እየጣሩ መሆናቸውን እናያለን። ሽንጎም የዚሁ እንቅስቃሴ አከል በመሆን ይንቀሳቀሳል፡ ከድርጅት ጉድጓዱ ወጥቶ በአንድ ላይ በሰልፍ ድምጽን ማሰማቱ ተገቢና አስፈላጊ መሆኑ ቢታመንም ይህ ብቻ መፍትሔ ያመጣል ማለት ግን አይደለም። መፈትሔ እንዲመጣ፣ችግሩ እንዲወገድ ከተፈለገ በአደባባይ ለመውጣት የሚሹት የተለያየ ድርጅቶች ከሰልፍ ባሻገር በአገር ቤት ካሉት ድርጅቶች ጋር በመተባበር ትግሉን ሊመራና ሊያቀናጅ የሚችል ግብረሃይል መፍጠር ይገባቸዋል። በተቃዋሚው ጎራ ብቻ የተሰለፈው ሳይሆን በመንግሥታዊ ዘርፍም ውስጥ የተሰለፈ ግን ስርዓቱ መለወጥ አለበት ብሎ የሚያምን ዜጋ የዚሁ ሕዝባዊ ትግል  አካል ሊሆን ይገባዋል። የሰው ህይወት እስካላጠፋና ሕዝብ እስካልበደለ ድረስ በመንግስት መዋቅር ውስጥ ሰርተሃል ተብሎ ሊገለል አይገባም።ወንጀል የፈጸመውም ቢሆን በማስረጃ በሕጋዊ መንገድ ሊጠየቅ ይገባል እንጂ በደም ፍላት ጥቃት ሊደርስበት አይገባም። ብሄራዊ መግባባትና አገራዊ እርቅ ለነገ የማይባል ተግባር ነው፡ ያ ካልሆነ አሁንም ዞሮ ዞሮ ዜሮ ይሆናል።

የኢትዮጵያ ሕዝብ የጋራ ትግል ሸንጎ ለዚህ ወሳኝነት ላለው አደረጃጀትና  ትግል  ተባባሪና ደጋፊ መሆኑን አሁንም በድጋሚ ሊገልጽ ይወዳል።

ለእውነተኛ ለውጥ በመከባበር ላይ የተመሰረተ አንድነት ግንባር ወሳኝ ነው።በጥቂት የውጭ አገር መንግስታትና ድርጅቶች እርዳታና ድጋፍ ሃይል አደራጅቶ ሥልጣን ለመያዝ ከመሯሯጥ ይልቅ በራስ ሕዝብ ፍቃድ፣ተሳትፎና ድጋፍ ለውጥ ማምጣት ከመቅለሉም በላይ የሚያስከብርና የሚያኮራ ነው።

የምንሻው ለውጥ ከሳት ወደ እረመጥ ወይም  ከድጡ ወደማጡ እንዳይሆን እንጠንቀቅ!!! 

ለመሰረታዊ ለውጥ ሁሉንም ያሳተፈ የተቀነባበረ የጋራ ትግል ወሳኝ ነው!! 

ድል ለኢትዮጵያ ህዝብ

Read more...

የኢትዮጵያ ህዝብ የጋራ ትግል ሽንጎ (ሽንጎ) የአመራር ምክር ቤት መደበኛ ጉባኤውን አካሄደ። የወቅቱን ሁኔታ ገምግሞ፣ የጋራ ትግሉን ለማጠናከር ተጨማሪ መመሪያ ሰጠ።

የኢትዮጵያ ህዝብ የጋራ ትግል ሽንጎ (ሽንጎ) የአመራር ምክር ቤት ቅዳሜ ጥር 28፣ 20008 (Feburuary 6, 2016) መደበኛ ጉባኤውን አካሂዷል። በዚህ ጉባኤው ምክርቤቱ ሀገራችን ኢትዮጵያ የምትገኝበትን ሁኔታ፣ በህዝባችን ትግል አኳያ የሚታዩትን ተስፋ ሰጭ ገጽታዎችና  አሳሳቢ ክስተቶችን በሰፊው ገምግሟል።  የሸንጎ የተለያዩ የስራክፍሎች የሚያካሂዱትን ተግባር በተመለከተ የቀረቡትን የስራ ዘገባዎች መርምሯል፡፡ በመቀጠልም በህዝበችን ላይ እየደረሰ የሚገኘውን ግፍ ሊያከትም እንዲችልም መካሄድበሚገባው ትግል ላይ አስፈላጊውን የተግባር መመሪያዎች ሰጥቷል፤ የትግል ጥሪም አስተላልፏል።

የ25 ዓመቱ የህወሀት/ኢህአዴግ የአምባገነን የግፍ ስርአት ኢትዮጵያን አደጋ ላይ ጥሏል። ኢትዮጵያውያንን አስመርሯል። በሁሉም የሀገራችን ክፍል የሚገኘው ኢትዮጵያዊህገ መንግስታዊ ዴሞክራሲያዊ ስርአት እውን የሚሆንበትን ጊዜ ናፍቋል።  መናፈቅ ብቻም ሳይሆን፣ አንድነቷ በተጠበቀ ኢትዮጵያ ስር መብቱን ለማሰከበር፣ የህግየበላይነትን እውን ለማድረግ፣ ከፋፋይ ስርአትን ለማስወገድ ሁሉም ኢትዮጵያዊ በየቦታው ተቃውሞውን በተለያየ መልክ በመግለጥ ላይ ይገኛል።ህዝባችን በተለያየየሀገሪቱ ክፍል መብቱን ለማስከበር ከፍተኛ መስዋእትነትን በመክፈል ላይ ነው። ስርአቱ በመፍረክረክ ላይ ይገኛል። ክንዱ ዝሏል። አደንቋሪ ፕሮፓጋንዳውንየሚያዳምጠውጆሮ አጥቷል። በሀገራችን ውስጥ ያለው ሁኔታ የሚያሳየው ሀገራችን  የለውጥ ዋዜማ ላይ መሆኗን ነው።

በዚህ አኳያ በአሁኑ ሰአት በመላ ሀገራችን በተለይም ደግሞ ኦሮሚያ፤ አማራና ጋምቤላ ተብለው በሚታወቁት ክልሎች  እየተካሄደ ያለውን  የመሰረታዊ  መብቶችመገፈፍን፤የመሬት ቅርምትንና ዘረፋን፣ ዳር ድንበርን ማስደፈርን፣  አግላይ የሆነን ፖለቲካና ህዝብን ከህዝብ የማጋጨት ተግባር የመቃወም ትግልና ህዝባዊ እምብተኛነት ሸንጎው ከዚህ በፊት ደጋግሞ  እንዳደረገው ሁሉ  አሁንም በጽኑ ይደግፋል።  መራራውን ጭቆናና ግፍ ባልተቋረጠ መልክ በህዝብ ላይ የጫነውን አገዛዝ በማስወገድ  ዴሞክራሲያዊ ስርዓትንና  በእኩልነት ላይ የተመሰረተን አንድነት ለመመስረት ትግል ከሚያደርጉ ሁሉ ጋር  የትግል  አጋርነቱን ይገልጻል።  

ስርአቱ ለዚህ የህዝብ ትግል ተገቢ ምላሽ ከመስጠት ይልቅ እንደተለመደው በማን አለብኝነት ለማፈን የሚወስደውን የሀይል እርምጃ፣ እስራት፣ ድብደባና ግድያ ምክር ቤቱ ያወግዛል።  በደል ለደረሰባቸው ሁሉም የሀዘናቸው ተካፋይነቱን ይገልጣል።  ከዚህ ሁኔታ ጋር ተያይዞም የታሰሩት ሁሉ ባስቸኳይእንዲለቀቁ፣  ንብረታቸው ለጠፋው እንዲሁም በስርአቱ የጸጥታ ሀይሎች ለተገደሉ አስፈላጊው ህጋዊ ካሳ ለቤተሰቦቻቸው እንዲከፈልና ገዳዮቹም ሆኑ ትእዛዝ ሰጭዎችለፍርድ እንዲቀርቡ ለማድረግ ሁሉም ኢትዮጵያዊ  ትግሉን እንዲቀጥል ምክር ቤቱ ጥሪ አቅርቧል።

ከዚህ ጋር በተያያዘም ይህን የህዝብ ትግል ለጠባብና ከፋፋይ አላማ ሊያውሉት የሚጥሩትን አንዳንድ የውስጥም የውጭም ሀይሎች እንዲሁም የስርአቱን ደባ ሁሉምኢትዮጵያዊ በጥንቃቄ ነቅቶ እንዲከታተልና የከፋፋዮች ሰለባ እንዳይሆንም ነቅቶ እንዲጠብቅ አሳስቧል።

የህዝባችንን  የትግል መነሳሳት ወደተፈለገው የስርአት ለውጥ እንዲያመራ የተቃዋሚው ወገን ታላቅ ሀላፊነት እንዳለበትና  በተናጠል የሚደረግ ትግል ለስርአቱ  እድሜመራዘም የሚያበረክተውን አስተዋጽኦ በመገንዘብ ይህን ሁኔታ ለመቀየር የሚያሰችል አስተማማኝና ቀጣይ ትግል ለማካሄድ ከሌሎች ተቃዋሚ ድርጅቶች ጋር በጋራለመስራት በሽንጎው በኩል የሚደረገውን ጥረት ከመረመረ በኋላ የተጀመረው ጥረት ተጠናክሮና ቅድሚያ ተሰጥቶት አንዲቀጥል፣ ሌሎች የአንድነት ሀይሎችም የጋራ ትግሉንእውን ማድረግ አጣዳፊነት ተረድተው ጠንካራ የተቃዋሚ ህብረት በመመስረቱ ተግባር ላይ በጋራ መረባረብ ይገባቸዋል ሲል ምክር ቤቱ ለሁሉም የአንድነት ሀይሎችየትብብር ጥሪውን በድጋሜ አስተላልፏል።

የህወሀት/ ኢህአዴግ አምባገነን ስርአት ዕለታዊ ተግባር በሀገሪቱ ውስጥ ሰላምና መረጋጋት እንዲጠፋ እያደረገ እንደሆነ አለም አቀፍ ህብረተሰቡ ተገንዝቦ  ይህን አደጋ ለማስወገድም የኢትዮጵያ ህዝብ  ለመሰረታዊ መብቱ መከበርና ፣ ለህግ የበላይነት  የሚያካሂደውን ትግል  እንዲያግዝ  ከምን ጊዜውም የላቀ ዲፕሎማሲያዊ  ትግልእንዲካሄድ ምክር ቤቱ ተጨማሪ መመሪያ ሰጥቷል።

በመጨረሻም መላው የኢትዮጵያ ህዝብ ለመሰረታዊ ጥያቄዎቹ መልስ ማግኘት ማለትም ለሰብአዊና ዴሞክራሲያዊ መብት መከበር፣ ራሱ የመረጠውና የሚቆጣጠረውመንግስት ለመመስረት፣ ለህግ የበላይነት መከበር፣ የከፋፋይ ስርአት እንዲያከትም የፖለቲካ ስርአቱ ውስጥ የኢትዮጵያ ህዝብ ሙሉ ተሳታፊ የመሆን  መብቱ እንዲከበር፣በነጻነትና ያለፍርሃች መኖር እንዲችል የኢኮኖሚ ተስፋ፣ የማሀበራዊ  ፍትህ ፣ እውን  እንዲሆን ሁሉም  ዜጋ ማንነቱ ተከበብሮ በቋንቋው የመጠቀም፣ ባህሉን  የማዳበር፣መብቱ ተጠብቆ መኖር...ወዘተ እንዲችል  ለሚደረገው  ትግል ሁሉም ኢትዮጵያዊ የትግል አጋርነቱን እንዲገልጥ የአንዱ ኢትዮጵያዊ መጠቃት የሌላው መጠቃት እንደሆነበመገንዘብ እጅ ለእጅ  በመያያዝ በተባበረ ትግል የጭቆናውን ስርአት ለማስወገድና ሁሉንም ኢትዮጵያዊ በእኩልነት  የሚያሰተናግድ ህገ-መንግስታዊ ዴሞክራሲያዊ ስርአትለመመስረት በጋራና በመተጋገዝ  እንዲታገል የሸንጎው  የአመራር ምክር ቤት ጥሪ አድርጓል።

ድል  ለኢትዮጵያ  ህዝብ

Read more...

የካቲት - የኢትዮጵያ ሕዝብ ለነጻነቱ የታገለበትና መስዋዕት የከፈለበት ታሪካዊ ወር

የካቲት በኢትዮጵያ ሕዝብ ታሪክ ውስጥ ትልቅ ቦታየያዘ ወር ነው። ጣሊያን አገራችንን በወረረበት ጊዜ ዜጎች በአንድ ቀን ጀንበር በየካቲት 12 ቀን 1929 ዓ.ም. ከ30ሺ ሰው በላይ በአዲስ አበባና አካባቢዋ ብቻ በጠላት መትረየስ የታጨዱበት፣ በአካፋ የተጨፈጨፉበት መስዋእት በመሆን ደማቸውን ያፈሰሱበት ዕለት በመሆኑ ሊታሰብና ሊከበር ይገባዋል። በዚያን ዕለት ጣልያኖች እርምጃውን ሲወስዱ ሕዝብ ፈርቶ ያድርልናል፣ ይገዛልናል በሚል እምነት ነበር። ውጤቱ ግን የብዙ ወጣቶችን ልብ የቀሰቀሰና ለትግል እንዲሰለፉ ያደፋፈረ ሆነ።

በዚያ ዓይን ያወጣ የጭካኔ እርምጃ የተጨፈጨፉት ዜጎች ከሁሉም የህብረተሰብ ክፍል የተወለዱና ከልዩ ልዩ ያገሪቱ ክፍሎች የተሰባሰቡ የከተማዋ ነዋሪ የሆኑ ኢትዮጵያውያን ናቸው። የጣሊያን ወራሪ ሃይል ጠቅላይ አዛዥ የሆነው ግራዚያኒ ሕዝቡን ሰብስቦበሱ የሚመራውን የወራሪውን አስተዳደር እንዲቀበልና ባወጣው ሕግ እንዲተዳደር ለማድረግ ብሎም የጣሊያን መንግስት ለኢትዮጵያ እድገትና መሻሻል እንጂ ለመጉዳት የመጣ አለመሆኑን ለማሳመንና ለድሆች እርዳታ እሰጣለሁ በሚል የማታለያ ሰበብ ስብሰባ ጠራ...... ሙሉውን ለማንበብ ይህን ይጫኑ

Read more...
Subscribe to this RSS feed